ఈ సినిమాని థియేటర్ లో పీకేసే టైంకి, ఆ సినిమా గురించి రాయడంలో నీ ఉద్దేశ్యం ఏన్టని నన్ను ఎవ్వరైనా నిలదీయచ్చు.సినిమా అంటే థియేటర్ కి వెళ్లే ఛూడక్కర్లేదుగా. చక్కగా సీడీ తెచ్చుకుని, రాణిలా/ రాజాల ఇంట్లో కూర్చుని ఏ ఆకుపకోడిలో (అదే థియేటర్ ఐతే పాతిక పెట్టీ మరీ ఏ పాప్ కార్నో కొనుక్కుని మేకల్లా నమలాలి) తింటూ చూడచ్చు. అందుకని రాస్తున్నా అని నన్ను సమర్దించేసుకోవచ్చు. కానీ నిజం చెప్పాలంటే, ఏమి చెయ్యను :( ?. నేను మొన్నే చూశాను. అందుకే ఇప్పుడు రాస్తున్నాను.ఇంక సుత్తి లేకుండా, సూటిగా( ఇది స్ప్రైట్ ఏడ్ కాప్షన్ నాకు తెగ నచ్చేసింది) ఈ సినిమా గురించి చెప్పాలంటే, చూయింగ్ గమ్ అరగంట నమిలితే బానే ఉంటుంది నోటికి. దాన్నే గంటన్నర నమిలితే పరిస్థితేంటి....? నోరంతా పాడవుతుంది......... ఈ సినిమా కూడా అంతే, తీసుకున్న సబ్జెక్ట్ మంచిది. సాగదీయకుండా మంచి నవల్‌గానో రాస్తేనో ( రాస్తే ఈ కాలంలో ఎవరు చదువుతారు అని నన్ను అడగొద్దు), గంటన్నర నిడివి సినిమాగానో తీస్తే చాలా బావుండేది.కానీ దాన్ని రెండున్నర గంటల సినిమాగా సాగదీసెసరికి, కథలోని ఫీల్ పోయింది .కొంచెం బోర్ కొట్టింది.
ఇంక కథ విషయంలో కి వస్తే, మన హీరో రాజా గారు అనాథ.తాను బ్రతకటానికి వేరే వాళ్ళ బలహీనతల మీద
ఆడుకుని అదే మేధావితనం అనుకుంటాడు. ఆ భ్రమ నుంచి ఎలా బయట పడ్డాడు, మానవ సంబంధాల గొప్పతనం ఎలా తీసుకున్నాడు అన్నదే కథ. రొటీన్ గా లవ్ ట్రాక్ కూడా ఉంది. రాజా కన్నింగ్ ఏక్షన్ చాలా బాగా చేశాడు.
ఇంక ఈ సినిమాలో నీతి(తెలుగు ప్రేక్షకులకి నచ్చాలంటే, అస్సలు నీతి అనే పదం కూడా సినిమాలో ఉండకూడదని దర్శకుడు నీలకంఠ కి ఎవరైనా చెప్పారో లేదో) ఏంటంటే కలసి పని చేస్తే కలదు సుఖం, కలిసి వచ్చును అదృష్టం అని
ఒకరి ఎదుగుదలకి ఇంకొకరు తోడ్పడాలి. అంతే కానీ పీతల్లా ఒకళ్ళని, ఒకళ్ళు కిందకి లాగేసుకోకూడదు.మనసనేది ఈర్ష, అసూయ, ద్వేషాలు లేకుండా అద్దంలా ఉండాలి అని. చూసి వదిలేయకుండా ఆచరిస్తే బానే ఉంటుంది (ఆచరించాలి కదా..!).
కమర్షియల్ ఫార్ములా ఫైట్లు, మాస్ పాటలు లేకపోయినా, బోర్ కొట్టించే సీన్లని ఓపిగ్గా చూసేసి, సినిమాలో ఉన్న మంచిని ఫీలయ్యి, ఆస్వాదించే విశాల హృదయం ఉన్న తెలుగు ప్రేక్షకుడు/ ప్రేక్షకురాలు మీరు ఐతే ఈ సినిమా తప్పకుండా చూడవచ్చు
P.S: నేను ఇందాక ఆకుపకోడీలు టాపిక్ తెచ్చానుగా. మీకు ఎవ్వరికైనా తినాలానిపించి, అవి ఎలా చెయ్యాలో తెలియకపోతే నాకో కామెంట్ ముక్క( ఉత్తరం ముక్కలా) రాసీపడేయండి. మా అమ్మ సహాయ సహకారాలతో ఆకుపకొడీలు-తయారీ విధానం అని ఇంకో పోస్ట్ రాసేస్తాను.
3 comments:
Waiting for that post (Pakodi).
అసలు కన్నా కొసరు బాగుంది.త్వరగా చెప్పండి ఆకుపకోడీల విధానం.దయచేసి ఇన్స్టెంట్ పద్దతి వుంటే చెప్పమనండి మీ అమ్మగారిని.
Good Review, I should say. I thing I liked about the movie was Genelia's character. We don't get to see such roles often in our movies.
తనకు కావాలిసిన మనిషిని తనకు నచ్చిన విధంగా మలచిన తీరు నన్ను ఆకట్టుకుంది.
Post a Comment